إدّفقى ..قاســــم أبو زيد

إدّفقى ..

قاســــم أبو زيد 

..........................................

ما تبقى رقراق

أبقى يا ضُل .. 

يا شموس

غطى المساحات بالوضوح

إستنهضى الشوق الجّروس

وهجك شوارع ذاتى

فى ليل اليباب

ما تشفقى  العطش .. 

الرحيل

النيل ركيزة

ودمعة الأحباب ..

سِحاب

ما تخافى من دم الغروب

لو رتّش الّلوحة الضباب

مادام ضمير الفينا .. 

حَىْ ...

مادام عِريق العِشق .. 

حى ..

ملحوقة يا مدن السراب

نديانة بفرح التساب

********

إدّفقى فيضان عمار

أتربعى .. 

وفِجّى الوجع

دمع الألم .. ما يدفّقك

ادفقي فيضان عمار 

وفجي الوجع

دمع الالم ما يهددك 

ما خاب غناك

فارسك رجع ..

اتوهجي ...

انتِ الشمس ..

اتلهّجي

نورك سطع 

نوّر بوادينا الفساح

رقصت مزامير الصباح

متكية قرية ..

وقنبلة

مسقية دمعة ..

وسنبلة

الليلة في ايدنا السلاح

ريشة ..

وكدنكة .. 

ومطرقة ..

نبنيك احسن يا ظروف ..

مخضرة دانية القطوف ..

نطوي المسافات نسبقا

إدّفقي بلدك فداك .. 

اتوهّطي

محمية بعرق الترابلة 

ونغمتك

مسقية بالريد العتيق ..

انغام رباباتك تشيل 

معزوفة الليل ..

الرفيق

ما تصغري ..

تكبر اماني السنبلة 

هيا اكبري

تصغر معاني القنبلة

ما ترجعي الصاد 

للمدائن والقرى

شيلي الشحوب .. 

والاصفرار

ادي البويتات منظرا

ادّفقي 

في كل شارع ..

وكل بيت

في روابينا المحنة ..

في ضمائرنا السهول

إدّفقي ..

في كل حتة ...

وكل زول

وابقي ..

شان تحيا الفصول !

__________________